| @២០១៣-រក្សាសិទ្ធិគ្រប់យ៉ាងដោយអគ្គិសនីកម្ពុជា\នាយកដ្ឋាន ម.អ.ជ. |
អំពីយើង
នាយកដ្ឋានមូលនិធិអគ្គិសនីភាវូបនីយកម្មជនបទ (ម.អ.ជ.) ជានាយកដ្ឋានមួយរបស់អគ្គិសនីកម្ពុជាដែលបានបង្កើតឡើងនៅឆ្នាំ២០១២ ដើម្បីរុញផ្លែផ្កានៃការអភិវឌ្ឍអគ្គិសនីឆ្ពោះទៅប្រជាពលរដ្ឋនៅជនបទនៅក្នុងព្រះរាជាណាចក្រកម្ពុជា។ ម.អ.ជ. មានលក្ខណៈសង្គមកិច្ច និងមានគណនីដោយឡែក។
ថវិកា
ប្រភពមូលនិធិដល់ ម.អ.ជ. មានដូចខាងក្រោម៖
១. កញ្ចប់ថវិកាសង្គមកិច្ចដែលបានគ្រោងក្នុងបញ្ជីថ្លៃលក់អគ្គិសនីរបស់អគ្គិសនីកម្ពុជា និងអំណោយដទៃទៀតរបស់អគ្គិសនីកម្ពុជា ប្រសិនបើមាន។
២. អំណោយ និងជំនួយឥតសំណងដែលប្រភព និងលក្ខខណ្ឌនៃការផ្ដល់ត្រូវបានទទួលការឯកភាពពីក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ។
៣. ថវិកាពីរាជរដ្ឋាភិបាលកម្ពុជា។
បេសកកម្ម
ម.អ.ជ. មានបេសកកម្ម ដូចខាងក្រោម៖
១. ជម្រុញវិសាលភាពអគ្គិសនីភាវូបនីយកម្មជនបទប្រកបដោយសមភាព ដោយសម្រួលឲ្យប្រជាពលរដ្ឋជនបទទទួលបានអគ្គិសនីប្រើប្រាស់ជាលក្ខណៈសេដ្ឋកិច្ច សង្គមកិច្ច និងគ្រួសារ។
២. ផ្តល់ការគាំទ្រដល់ការរៀបចំ និងអនុវត្តគម្រោងអគ្គិសនីភាវូបនីយកម្មជនបទ។
៣. ផ្តល់ការគាំទ្រ និងជួយសម្រួលដល់គ្រួសារក្រីក្ររស់នៅតំបន់ជនបទ អាចទទួលបានការតភ្ជាប់ចរន្ត អគ្គិសនីពីប្រព័ន្ធផ្គត់ផ្គង់អគ្គិសនី ដោយការផ្តល់បា្រក់កម្ចីអនុគ្រោះគ្មានការបា្រក់។
៤. ផ្តល់ការគាំទ្រ និងជួយសម្រួលឲ្យគ្រួសារជនបទរស់នៅតំបន់ដាច់ស្រយាលដែលខ្សែបណ្ដាញអគ្គិសនី មិនទាន់អាចពង្រីកទៅដល់ក្នុងរយៈពេលយូរ អាចទទួលបានអគ្គិសនីប្រើប្រាស់តាមរយៈប្រព័ន្ធថាមពល ពន្លឺព្រះអាទិត្យតាមផ្ទះ។
៥. ផ្តល់ការគាំទ្រ និងជួយសម្រួលឲ្យអ្នកផ្គត់ផ្គង់អគ្គិសនីឯកជននៅតំបន់ជនបទ ដែលមានអាជ្ញាប័ណ្ណស្របច្បាប់ អាចមានទុនសម្រាប់ធ្វើការវិនិយោគពង្រីកហេដ្ឋារចនាសម្ព័ន្ធផ្គត់ផ្គង់អគ្គិសនីឲ្យពេញដែនអាជ្ញាប័ណ្ណចែកចាយរបស់ខ្លួន ដើម្បីឲ្យប្រជាពលរដ្ឋគ្រប់គ្រួសារអាចភ្ជាប់ចរន្តប្រើប្រាស់តាមលទ្ធភាពរបស់ខ្លួន។
៦. ផ្តល់ថវិកាឧបត្ថម្ភធនប៉ះប៉ូវបង្គ្រប់ថ្លៃលក់អគ្គិសនីដល់អ្នកកាន់អាជ្ញាប័ណ្ណធ្វើអាជីវកម្មអគ្គិសនី ដែលបានភ្ជាប់ប្រភពអគ្គិសនីជាមួយប្រព័ន្ធបណ្តាញជាតិ ដើម្បីបន្ថយថ្លៃលក់អគ្គិសនីដល់គ្រួសារក្រីក្រនៅតំបន់ជនបទ ក្នុងក្របខណ្ឌនៃផែនការយុទ្ធសាស្ត្របន្ថយអត្រា និងគម្លាតថ្លៃលក់អគ្គិសនីក្នុងព្រះរាជាណាចក្រកម្ពុជាសម្រាប់ឆ្នាំ២០១៥ ដល់ឆ្នាំ២០២០ តាមបណ្តាខេត្តនិងរាជធានី។
៧. ផ្តល់ការគាំទ្រ និងជួយសម្រួលដល់គ្រួសារក្រីក្ររស់នៅតំបន់ជនបទ ទទួលបានការផ្គត់ផ្គង់អគ្គិសនីពីប្រព័ន្ធបណ្តាញជាតិផ្ទាល់សម្រាប់ការបូមទឹកធ្វើកសិកម្មនៅតម្លៃអនុគ្រោះសម្រាប់ការប្រើប្រាស់អគ្គិសនី នៅពេលយប់ចាប់ពីម៉ោង ៩:00យប់ ដល់ម៉ោង ៧:00ព្រឹក និងនៅតម្លៃធម្មតាសម្រាប់ការប្រើប្រាស់អគ្គិសនីនៅពេលថ្ងៃចាប់ពីម៉ោង ៧:00ព្រឹក ដល់ម៉ោង ៩:00យប់។
៨. ជម្រុញការធ្វើពាណិជ្ជកម្មបច្ចេកវិទ្យាថាមពលកកើតឡើងវិញ ដែលត្រូវបានទទួលស្គាល់ជាលក្ខណៈបច្ចេកទេស និងពាណិជ្ជកម្ម។
អាស្រ័យនឹងលក្ខខណ្ឌថវិកាដែល ម.អ.ជ. ទទួលបានពីប្រភពផ្សេងៗ ម.អ.ជ. នឹងប្រើប្រាស់ឲ្យអស់លទ្ធភាពនូវធនធានដែលខ្លួនមាន ដើម្បីសម្រេចឲ្យបាននូវបេសកកម្មខាងលើ។
កម្មវិធី
ម.អ.ជ. កំពុងអនុវត្តន៍កម្មវិធី ដូចខាងក្រោម៖
- កម្មវិធីផ្តល់ចរន្តអគ្គិសនីដល់គ្រួសារក្រីក្រ៖ គោលបំណងនៃកម្មវិធីនេះ គឺជួយដល់គ្រួសារក្រីក្ររស់នៅតំបន់ជនបទ ដើម្បីឲ្យគ្រួសារក្រីក្ររស់នៅតំបន់ជនបទ អាចទទួលបានការតភ្ជាប់ចរន្តអគ្គិសនីពីប្រព័ន្ធផ្គត់ផ្គង់អគ្គិសនី ដោយការផ្តល់បា្រក់កម្ចីអនុគ្រោះគ្មានការបា្រក់ឲ្យគ្រួសារជនបទខ្ចីយកទៅ៖ ១- បង់ថ្លៃភ្ជាប់ចរន្តឲ្យអ្នកផ្គត់ផ្គង់ ២- បង់ថ្លៃប្រាក់កក់ឲ្យអ្នកផ្គត់ផ្គង់ ៣- ចំណាយលើការទិញ និងរាយខ្សែពីចំណុចភ្ជាប់ចរន្តមកដល់ផ្ទះរបស់ខ្លួន និង៤- ចំណាយលើការរៀបចំខ្សែបណ្តាញ និងឧបករណ៍អគ្គិសនីក្នុងផ្ទះ ដើម្បីតភ្ជាប់ចរន្តអគ្គិសនីចូលផ្ទះ។ បា្រក់កម្ចីនេះនឹងទូទាត់តាមរយៈអ្នកផ្គត់ផ្គង់អគ្គិសនី ដែលជាអ្នកទទួលខុសត្រូវក្នុងការបង់សងត្រឡប់មក ម.អ.ជ. វិញ ដោយបានមកពីការប្រមូលពីអ្នកខ្ចីដែលត្រូវបង់សងរំលស់១ខែម្តងមក ម.អ.ជ. ក្នុងរយៈកំណត់មួយ។ ចំនួនទឹកបា្រក់កម្ចីអនុគ្រោះនេះ គឺមិនលើសពី 480,000 រៀល ក្នុង១គ្រួសារ។
- កម្មវិធីប្រព័ន្ធថាមពលពន្លឺព្រះអាទិត្យតាមផ្ទះ៖ គោលបំណងនៃកម្មវិធីនេះ គឺជួយសម្រួលឲ្យគ្រួសារជនបទរស់នៅតំបន់ដាច់ស្រយាល ដែលខ្សែបណ្ដាញអគ្គិសនីមិនទាន់អាចពង្រីកទៅដល់ក្នុងរយៈពេលយូរ អាចទទួលបានអគ្គិសនីប្រើប្រាស់តាមរយៈប្រព័ន្ធថាមពលពន្លឺ ព្រះអាទិត្យតាមផ្ទះ។ ម.អ.ជ. ផ្តល់បា្រក់ឧបត្ថម្ភធនចំនួន ១០០ដុល្លារអាមេរិក ក្នុង១ប្រព័ន្ធដល់គ្រួសារជនបទ ដើម្បីជួយកាត់បន្ថយការទូទាត់ថ្លៃទិញប្រព័ន្ធ ហើយអ្នកទិញត្រូវបង់ថ្លៃសល់ពីការឧបត្ថម្ភធននេះ រំលស់ប្រចាំខែដោយគ្មានការប្រាក់មក ម.អ.ជ. វិញ ក្នុងរយៈពេល ៤ឆ្នាំ។ ក្រោយពេលបង់រំលស់អស់ជាស្ថាពរ ប្រព័ន្ធនេះនឹងក្លាយជាកម្មសិទ្ធិរបស់អ្នកទិញ។
៣. កម្មវិធីជួយទុនសម្រាប់ពង្រីក និងកែលម្អការផ្គត់ផ្គង់អគ្គិសនីនៅតំបន់ជនបទ៖ គោលបំណងនៃកម្មវិធីនេះ គឺជួយសម្រួលឲ្យអ្នកផ្គត់ផ្គង់អគ្គិសនី ឯកជននៅតំបន់ជនបទដែលមានអាជ្ញាប័ណ្ណស្របច្បាប់ អាចមានទុនសម្រាប់ធ្វើការវិនិយោគពង្រីកហេដ្ឋារចនាសម្ព័ន្ធផ្គត់ផ្គង់អគ្គិសនីឲ្យពេញដែនអាជ្ញាប័ណ្ណចែកចាយរបស់ខ្លួន ដើម្បីឲ្យប្រជាពលរដ្ឋគ្រប់គ្រួសារអាចភ្ជាប់ចរន្តប្រើប្រាស់តាមលទ្ធភាពរបស់ខ្លួន។ លក្ខណៈវិនិច្ឆ័យសម្រាប់ការអនុវត្តកម្មវិធីនេះចែកចេញជា ៣តំបន់ ផ្អែកលើដង់ស៊ីតេប្រជាពលរដ្ឋ ដូចខាងក្រោម៖
- -តំបន់មានប្រជាពលរដ្ឋរស់នៅច្រើន ដែលមានប្រសិទ្ធភាពសេដ្ឋកិច្ច៖ ម.អ.ជ. នឹងផ្តល់ការធានាលើការខ្ចីឥណទានពីធនាគារក្នុងស្រុករបស់អ្នកផ្គត់ផ្គង់អគ្គិសនីនៅតំបន់ជនបទ ដើម្បីយកទៅវិនិយោគពង្រីកហេដ្ឋារចនាសម្ព័ន្ធផ្គត់ផ្គង់អគ្គិសនីឲ្យពេញដែនអាជ្ញាប័ណ្ណចែកចាយរបស់ខ្លួន។
- -តំបន់មានប្រជាពលរដ្ឋរស់នៅមធ្យម ដែលការធ្វើ អាជីវកម្មផ្គត់ផ្គង់អគ្គិសនីអាចពុំចំណេញ ប្រសិនបើ អ្នកផ្គត់ផ្គង់អគ្គិសនីត្រូវបង់ការបា្រក់លើដើមទុនវិនិយោគ៖ ម.អ.ជ. នឹងផ្តល់ថវិកាកម្ចីដោយពុំយកការប្រាក់ សម្រាប់វិនិយោគលើហេដ្ឋារចនាសម្ព័ន្ធផ្គត់ផ្គង់អគ្គិសនីនៅតំបន់ជនបទ។
តំបន់ទី៣-តំបន់មានប្រជាពលរដ្ឋរស់នៅតិចតួច ដែលការធ្វើអាជីវកម្មផ្គត់ផ្គង់អគ្គិសនីមិនចំណេញ លុះត្រាមានការផ្តល់បា្រក់ឧបត្ថម្ភធនមួយផ្នែកលើទុនវិនិយោគហេដ្ឋារចនាសម្ព័ន្ធផ្គត់ផ្គង់អគ្គិសនី៖ ម.អ.ជ. នឹងផ្តល់បា្រក់ឧបត្ថម្ភធនមួយផ្នែកបន្ថែមពីលើប្រាក់កម្ចីឥតមានការប្រាក់ សម្រាប់អ្នកផ្គត់ផ្គង់អគ្គិសនីធ្វើការវិនិយោគហេដ្ឋារចនាសម្ព័ន្ធផ្គត់ផ្គង់អគ្គិសនីនៅតំបន់ជនបទ។
៤. កម្មវិធីផ្តល់ថវិកាឧបត្ថម្ភធនប៉ះប៉ូវបង្គ្រប់ថ្លៃលក់អគ្គិសនីដល់អ្នកកាន់អាជ្ញាប័ណ្ណធ្វើអាជីវកម្មអគ្គិសនី ដែលបានភ្ជាប់ប្រភពអគ្គិសនីជាមួយប្រព័ន្ធបណ្តាញជាតិ ដើម្បីបន្ថយថ្លៃលក់អគ្គិសនីដល់គ្រួសារក្រីក្រនៅតំបន់ជនបទ ក្នុងក្របខណ្ឌនៃផែនការយុទ្ធសាស្ត្របន្ថយអត្រា និងគម្លាត ថ្លៃលក់អគ្គិសនីក្នុងព្រះរាជាណាចក្រកម្ពុជាសម្រាប់ឆ្នាំ២០១៥ ដល់ឆ្នាំ២០២០ តាមបណ្តាខេត្តនិងរាជធានី៖ គោលបំណងនៃកម្មវិធីនេះ គឺផ្តល់ថវិកាឧបត្ថម្ភធនប៉ះប៉ូវបង្គ្រប់ថ្លៃលក់អគ្គិសនីដល់អ្នកកាន់អាជ្ញាប័ណ្ណធ្វើអាជីវកម្មអគ្គិសនី ដែលបានភ្ជាប់ប្រភពអគ្គិសនីជាមួយប្រព័ន្ធ បណ្តាញជាតិ ដើម្បីបន្ថយថ្លៃលក់អគ្គិសនីដល់គ្រួសារក្រីក្រនៅតំបន់ជនបទ ក្នុងក្របខណ្ឌនៃផែនការយុទ្ធសាស្ត្របន្ថយអត្រា និងគម្លាតថ្លៃលក់អគ្គិសនីក្នុងព្រះរាជាណាចក្រកម្ពុជា សម្រាប់ឆ្នាំ២០១៥ ដល់ឆ្នាំ២០២០ តាមបណ្តាខេត្ត និងរាជធានី។
៥. កម្មវិធីផ្តល់ការផ្គត់ផ្គង់អគ្គិសនីសម្រាប់បូមទឹកធ្វើកសិកម្ម៖ គោលបំណងនៃកម្មវិធីនេះ គឺជួយសម្រួលដល់គ្រួសារក្រីក្ររស់នៅតំបន់ជនបទទទួលបានការផ្គត់ផ្គង់អគ្គិសនី ពីប្រព័ន្ធបណ្តាញជាតិផ្ទាល់ សម្រាប់ការបូមទឹកធ្វើកសិកម្ម នៅតម្លៃអនុគ្រោះសម្រាប់ការប្រើប្រាស់អគ្គិសនីនៅពេលយប់ចាប់ពីម៉ោង ៩:00យប់ ដល់ម៉ោង ៧:00ព្រឹក និងនៅតម្លៃធម្មតាសម្រាប់ការប្រើប្រាស់អគ្គិសនីនៅពេលថ្ងៃចាប់ពីម៉ោង ៧:00ព្រឹក ដល់ម៉ោង ៩:00យប់។